في السفر

في السفر

 

في السفر

ف السفر..كثير أحلام تنكتب

على قلب السحاب

بين غيمه وبين غيمه

تتخبى أرجوحة هوى

عن عيون الحاسدين

بيت مرمر...ممتلي سكر زيادة

ممتلي جوري  وبيبانه حنين

وتنتهي الأحلام

و أحيان تتحول مطر

وأحيان ..تنبت براعم ياسمين

وأحيان ..يشربها البحر...

يعني بإختصار

أحلام السفر...مثل السهر

ومثل زخات الأنين

تتبخر و لا  يبقى

لها أية أثر

مثل الصبح  لما يجي

تذوب أحلام السهارى ...

وضفاير الشمس

من الظلمة تبين !

ويا معين الراحلين ..

وش يسوي من فارق

حبيب..وما بقى بينهم

إلا بطاقات ..وصور

وكلمة ..غارقة

ف زوايا ..كم مسج

ما تروى العطش

ولا  تزيد إلا الوجع

في قلوب الصابرين !

 

شهر سبعه /يوليو

والصيف والغربة

والمطارات الحزينة والفراق

زحمة اللحظة الأخيرة

و إختلاطات المشاعر والنفاق

اللي رايح ..يقضى شهر العسل

واللي طفران ويعاني من ملل

واللي  يدور عن علاج

واللي هارب من زواج

والحقايق  للأسف جدا"ن" مفزعه

واحد يسافر يبي يعدل هالمزاج

وواحد مل  دور الازدواج

ورايح بعيد

عشان يريح وجهه من التمثيل

ولبس الأقنعة !

 

ويسألوني

ليه يحزنك طارئ التذاكر

والسفر..

وليه السفر ؟

و أنا بدونه...

أعيش عمري ف اغتراب

ما يلزمني  أطير  إلى فوق السحاب

عشان أرسمك لوحه...

لنك ...متبعثر في كياني

كلك إلى حد النخاع...

احبك من هنا....

إلى ...آخر حدود

الاندفاع !

 

العنقاء

نشرت في جريدة فتون

Related Posts