خارج نطاق الرماد

خارج نطاق الرماد

وطن الياسمين

 

يا ظلال الياسمين.

يا صباحات الحنين..

وغصن نايم

..منكسر ..يابس حزين

يا وطن ....يسوى الحياة .

يا ريحة الصبح ودفاه .

يا رذاذ يتمخطر بين  أنفاس الحواير

يداعب أحاسيس   الستاير ...

يتسلل إلى قلب البيوت،،

يترك بصمته   على  الجدران

يملا بيوت الطين حتى النخاع ألوان...

يا ارض انولد  فيها أمي وأبوي

أغلى الحبايب

يا بلادي ..يا سكر و.ذايب

يا بلد السحاب

يا للى فيك طعم ثاني حتى للسراب

يا اطهر ندى  تناثر على  طين المزارع

والهضاب...

 

يا بلادي

يا للي طهرك يشبه  حبات العرق..

على جبين إنسان تربي فيك

من أول أنفاسه الين شاب

بلادي....

يا اللي رمالك تبر ممزوج بكرامه
اختلط عزك بهامات النخيل

 

يا صباحات الشاهي الحليب

و"خبز امى"  و الماضي القريب...

يا بياض الملح

كسى جسد المراكب والسفاين واليخوت

يادفا ايدين طفل

يقود جده للصلاة ...في سكوت ..

يا "قهاوى العصر" جدام البيوت

ونقاشات الحريم عن آخر أحداث المسلسل..

عن اللي مات واللي بالآخر يموت

احبك...بكل تفاصيلك  بلادي

من جديد الطوب إلى خشب الدرايش

من عقل هذا الطفل

إلى شاب  مستهتر وطايش

بلادي ...

يا قصة وفا ..حب في ف الأرواح

عايش ...

 

العنقاء
نشرت في جريدة فتون