ذكرى رسايلنا الورق

ذكرى رسايلنا الورق

 

 

 

 

 

 

 

 

 

 

خسارة

ذكريات كثير راحت

ومنها صناديق البريد

و الرسايل والورق

راحت ليالي الانتظار

لا ترقب،

لا تعاسة أو أرق!

 

*كل شي في زحمة

مشاغلنا غرق

ومثل باقي الأشياء الجميلة

اختفت رسايلنا الورق

وصارت ذكريات

و اختفى نبض الحروف

وصار أقرب للممات

و لونها كنه رمادي

وما فيها غير بعض الأسامي

فارق اغلبها الحياة !

 

 

 

 

 

*صناديق البريد

 ما صارت مثل أول

مليانه برسايل

تجينا  من بعيد

وين راح زمن الكتابة

و أقلام الحبر

والورق ذاك القديم

مرشوش بعطر

كان  مرسوم على أطراف

بعضه فراشات ونخيل 

وأحيانا حروف

وعاشقين

ماسكين الأيادي

في عز الأصيل،

مع الأسف

ما صار حد يستخدم هالورق

مثله مثل باقي الأشياء الجميلة

في زحمة تطورنا غرق

 

 

 

 

 

 

في هالزمن صارت صناديق البريد

قلب فارغ من حديد

صار يجي لك  في الدقيقة

ألف mail

الرسايل ما عادت ورق

ولا صارت مرشوشة

حب ونجوم

ولا صارت مليانه طوابع  

او ختوم

ولا صرنا نقدر نخبيها

تحت الوسايد

وتطيرنا إلى فوق الغيوم

ونغرق في نبضها

لين الصبح !

 

العنقاء

Related Posts