بقعة حزن لا تنضب

بقعة حزن لا تنضب

كل شي بعدك تمام !
عاشتها :العنقاء



*كل شي بعدك تمام
كذبه وصدقوها
كل من حولي و ربعي
وصدقوا اني نسيت
وصاروا يحسدوني إن  غفيت
ويحسدوني  عالسكوت
ويحسدوني عالتلعثم
ويحسدوني عالكلام
وصار تمثيلي التصبر
مثل اصبع اتهام
في نظرهم صرت اعاني 
من جفاف
ومن تصحر
ومن تحجر
واني اشبه بالصلابه
بعض انواع الرخام !

*قالوا وايد
وفي الحقيقه
لو رأوني بعد ساعات الدوام
كان قالوا :ان هذي ماهي هي
فيه شي !
كان قالوا :ان فيني انفصام !

*بعيداً عن نظرهم
تنهار اوجاعي وصبري
ينتهي دوري المنسق في مسلسل :
"كل شي بعدك تمام"
هنا اخلع  عن قلبي  القناع
و تتحرر كل احزاني السجينة
و تتنفس مساماتي وتحيا
من بعد وقت التصنع والخداع
هنا يرجعلي وجومي
وترجعلي همومي 
من بعد صبح التبسم
و التظاهر و  الضياع 
ألف دور و ألف دور
كان ابسطها  امثل
دور حية
واعصابي قوية
وداخلي كومة  حطام !

* كل شي يمكن تمام
غير إني ما أنام
وصرت ما أحلم كثير
و كل حزن  صار تافة
إلا فقدك يالحبيبة
صار فيني مستدام
*في الحقيقة كثير ناس  
يحسدوني
ولو يجوني
لما اطفي انواري وشمعي
كان شّكوا  اني جنية حزينة 
حظها المقرود علقها بإنسي
حب عكسي
لو تطوله حتماً تأذت وهو تأذي
يعني بإختصار :حب فاشل
مليان بمشاكل
عاشقة، أفنت عمرها
في الانين
و في التمني و فالغرام ! 

*كل شي يمكن تمام
غير اني صرت مجنونة قبور
وكل مامريت جنبك
احسد قبر ضمك من شهور
واكتم الدمعه بقوة
ما ابي قلبك يحس اني ابكي
واني من رحلتِ
صار حزني "من هنا لمليون عام"
واقرأ اية الكرسي ...وادعي 
واتخيل فيها كل انفاسي وحبي
تتسرب  لقبرك
مثل زخات الرهام !

*لولا ان النوح عالميت  حرام
كنت بتمرغ ع قبرك
و بلمس كل ذرة من ترابك
و بذرف حر دمعي من غيابك
وبنشد كل ذرة م التراب : كيف امي ?
وش بقى غير العظام ?
كيف أمي ?
كانت حيل تكره
النوم في عمق الظلام ?
كيف نامت
انشدك بالله
خافت ?
والا الصلاة والتصدق والتسامح
نورت ظلمة قبرها
و أمطرت برد وسلام

*ويسألوني عن حياتي
واغص في الدمعه واكابر:
كل شي اصلاً تمام ! 
غير اني  والفرح
بيننا حالة خصام
لا اجيه ولا يجيني
ولا اهمه و لا لقي مني اهتمام

*و بين فتره وبين فتره
اوقف عند بابك
اللي فقد من سنه لمسة يديك
واتصنت واسمع
واقول: يجوز اسمعها تصلي مثل أول
واوقف كثير
وانتظر صوتك بجيني
وانتظر تناديني تعالي
ولا تنادي
وارحل مثقلة بالانهزام

*كل شي يمكن تمام
غير اني انتظر في كل ليلة
تحضنيني في المنام
و اجبر عيوني تغمض
وتحت راسي "شالك البني"
وفي يديني مسباحك  هديه
وحتي سجادة صلاتي
كانت سجادة صلاتك
و كل شبر من حياتي ..
كان في الواقع حياتك
فيه انتِ
فيه ذكرى من عطورك
فيه نفحة من حضورك
وبعد هذا ...كيف أنسى؟
وكل ماحولي ...يا أمي
فيه منك...
حتى اسلوب الكلام





* كل شي يمكن تمام
غير ان ذكرياتك عامله فيني زحام 
سريرك والشراشف
ياسمينك مات خايف
ولا صارت تجينا كل صبح
مثل اول
اسراب الحمام
لما كنتي تنثري الحب وتنادي
ومن بعيد
يمتلى حوشنا ...عصافير وطيور
وينهم بعد موتك ?
ما صاروا يمروا من شهور
واختفوا مثل باقي الاشياء الجميلة
اللي راحت من رحلتي
كنها خاصمت حوشنا الواسع وراحت
وذابت في السما
مثل اسراب الغمام

*  يا اهل القبور 
كم من بشر ماتوا معاكم
رغم انهم عايشين
كم من بشر قاموا وناموا
مثّلوا دور التصبر
وفي دواخلهم حزين
يا رب كثر ما صبرت قلوب
نسألك ترضى علينا 
ونسألك حسن الختام