الرماد إذا تنهد

لأن الشتا جذاب

*دام الشتا واقف على الابواب

خلينا نخترع للقا أسباب

خلنا نقول انك

نسيت "كوتك" ذاك الشتا عندي

او نسيت "شالي" انا عندك

اباك تقول

انك تحس بضيق من بعدي

واحلف اني احس

بضيق الكون من بعدك

و ابا ترسل لي رسالة لونها وردي

عشان يصير عطري هالمسا وردك

بخبيها تحت راسي

واذا حسيت بالوحدة

وزاد البرد عن حده

بخليها تحت خدي وبتخيل انها خدك

وبتخيلك تنتظر ردي

وانا غارقه الين العظم في ردك!

*دام الشتا جذاب

تعال نخترع للقا أسباب

اهديني شي انا احبه

مثلا، خلينا نقول : كتاب

وخبيلي في الوسط منديل

في اول الصفحات

اكتب لي بعض احساسك

وعطرها بعطرك الشانيل

ودللني اذا امرض مثل طفلة

طوال الوقت بالالعاب

*ودام البرد هالشتا زاد

بسألك كثر الجفا وش فاد؟

عاى الاتي خلينا نتفق

و نخرج عن المألوف والمعتاد

بنشعل جمر المسا

ذكرى واسرار وعبق

وخلينا نتمرد على الاعداد

ونحاول نحصى اعداد النجوم

وبعثر لي حروف

عين

شين

قاف

وبلملمها عشق

وبصير لك كبريت

شمع احمر

و بخيط لك من ضلوعي كوت

واذا جاني البرد

بناديلك

وبتمنى على صدرك يجيني الموت

ولا بلحظة نفترق

اخر النزف :

مايخفف هالشتا البارد

غير حلم

فيه أمي تبتسم

ضحكتها اللي تخلي كل الجروح

في ثواني تلتئم

تقول : قريب جدا نلتقي

بأرواحنا

مكان دافي

بالمحبة مزدحم

العنقاء

دام الشتا واقف على الابواب خلنا نخترع للقا أسباب*العنقاء

يا صباحات الشاهي الحليب *العنقاء

صباح عرايسنا الخشب

صباح زمان
ما كنا نعرف باربي ولا فله
كانت عرايسنا الخشب
تسوى كوننا كله
زمان وراح
وراحت بعد أمي !

*العنقاء

اسمحيلي يا جميلة

اسمحيلي يا جميلة
المسي عرقي الحزين
ازهري فيني حنين
حولّي حزني خميلة !
*العنقاء

ذكريات مطر

ذكريات...مطر

كانت الارض

اذا شافت سحاباتي

تمتلي لهفة

وتتشكل مداين عشق

من احساس

وتصير الارض أسطورة

يسعد فيها

جميع الناس

والعشب يضحك

والاشجار

تتوهج

وتتغنج

على عزف ايقاعي

وأتناثر عقد الماس !

اجي منساب

اجي اشاكس ورق الشجر

و يعاتبني اذا

طولت ف الغيبة

كننا احباب

اجي ويجي الفرح

طاير على وقعي

يتسابق على شكل اسراب

تنتظر هالأرض

جياتي مثل

طفل"ن"

ينتظر هدية عيد

من أمه

ويتخيل طوال الوقت

صوتها ع الباب

اجي على مهلي

واغسل هموم الارض

واصافح ورق الشجر

لين اشوفه رجع

اخضر ويسحر الالباب

اجي ناعم ف بعض احيان

اجي ولهان

اجي اشبه

سيمفونه...كلها الوان

اجي بكل الطيبة

والتحنان

اجي

اطبطب.. على الاوراق

والاغصان

اجي طفل "ن"

داخله فنان

يرسم ،

دفتره هالارض

وفرشاته

انامل صاغها الرحمن

يرسم مره عــــ التراب قلوب

ومره يغرقها مطر

الين تذوب

ويركض

على صفحة نساها الغيم

ومن ثاني

يرجع يكتب اسمه

بالمقلوب

اجي شفاف

اجي اونس

ف قلب السيح

شجرة غاف

وطفل صغير في لهفة

يصنع

من الورق زورق

يبحر بلا مجداف

وتهمس زهرة نعسانه

غصنها كان قبل اليوم

مـ المحبة جاف

وتنتعش لحظة

وترتعش م الشوق

وتنكتب عـــ الرمل كلمة

بدايتها

الف وحاء

ونهايتها باء وكاف

كلمة

والنوارس تطالعها

بعجب

وتضحك

عــ البحر اصداف