يا رب مايطلع على عيوني صباح

يا رب مايطلع على عيوني صباح

يا رب ما يطلع

على عيوني صباح!


 

الليلة

لو حصل إني ومت

بموت مزحومة  بجراح-

يا رب ما يطلع على عيوني

صباح..!
 

 

ودي ف هالليله جناح

ياخذني بعيد ..

و أسافر للغيوم

واجمع ف منديلي

حفنة نجوم

ازرع نجمتين ف قلب الجدار

واعلق نجمتين ف غرفتي

تضويني ف عز النهار

واخبي الباقيات

تحت وسادتي..

وبعضها ما بين الهدوم ..

بسامرها ..بغلا

وبعلمها وش معنى الهموم!

 

ودي ف هالليله لحاف

شرشف ف بياض الثلج

محشو بالدفء والنور

مرسوم  على طرفه اليمين

ورده عانقت عصفور

ودي أتخبى  فيه إلى حد النخاع

وانسي وش ممكن بكره

يصير

و لا أفكر ف لقانا

ولا أفكر  ف الوداع!

ودي ف هالليله ....نورس وحيد ...

ياخذ ..همومي ويسافر بعيد

يرميها ..ف  ..

عرض البحر ...وتاخذها الرياح

وتغرق ..هناك ..

ويجينا الصباح ..

وأنسى أنا ..أخيرا

 وش معنى الجراح ..

 

العنقاء

نشرت في جريدة فتون الاسبوعية

Related Posts