بطاقات

بطاقات

وقعتها  بكل إخلاص : العنقاء

بطاقة غرام
 

من هنا ل-باريس

لآخر مدى بالكون

للمريخ

للزهرة

من حدود الأمس

لوقتنا الحاضر

الين أعوام

لكل العمر..

والين ..هذا القلب

يتحلل  في ثرى  قبره

أنا احبك ..بكل العقل

بكل الطيش

رغم الخوف  من بكره!

واحبك ..يا عساك تعيش

في الفرح أعوام

ولا يلحقك م الحزن

شعره!

بطاقة حنين
 

وين أختفى زمان القيظ والخيط والابره؟

وين اختفت مراجيح الخشب

لي  كانت تتمايل على السدره ؟

وين اختفت عرايسنا الخشب

وين اختفت  قلوب

كانت تعرف تحب

ولا تعرف رغم

الألم تكره

ولا تعرف

وين اختفى منا الامان

ولا بقى

إلا الخوف من بكره

وين اختفى الدفا

ولا بقى

إلا البرد والآهات والحسرة !

 

بطاقة وداع
 

روح إذا تبي

بس اعفينى من تفاصيل الوداع

الله سهل لفراقنا كل الدروب

ما بقى عندي دموع

ولا مناديل وضياع

الشوارع داكنة

ترتجى منك شعاع

فيها زحمه

من عذابات القلوب

كنت أتمنى عن حبك أتوب

و كم مره نويت أتوب ولا أتوب

كم مره أموت واختنق واغلب تفاصيلي عذاب

ونصها الباقي شحوب !

بطاقة ووعد
 

و أوعدك لو يمر العمر كله

ما يهز القلب غيرك

وتبقى اوكسجيني

وتبقى

نبض النبض فيني

وتبقى رغم البعد

وحدك من يقدر

يصحي

في قلبي حنيني ..

العنقاء

نشرت في جريدة فتون

Related Posts