وحشتيني

وحشتيني

(1)

أمي ولو تقومي بخير

ب-تبتسم كل الحروف

والدروب  تصير غير

تصير جنه

والمزارع تصير

بيت لكل طير

غصب عن تراب الهم

تتسلف فرح

يا أدفا قلوب الكون

ويا محبه مالها تفسير

(2)

أصحي يا أمي

وخذيني مثل أول

طفلة اكذب ، طفلة أزعل

أتمادى بغيابي

اسأليني عن حبوب الوجه هذي

وش سببها

عاتبيني

لني آكل كثير فلفل !

(3)

وحشتيني

وضاقت هالمساحات الكبيرة

وضاقت هالدروب

وما بقى بالدنيا شي

يسوى شي

إلا أنتي

شمس هذا  الكون كله

ومن مرضتي

صارت الدنيا غروب ف غروب

(4)

اصحي يا أمي

وناديني مثل أول قوليلي : تعالي

عاتبيني لني البس كعب عالي

اضحكي مثل أول : وش هذا يا بنتي

"موضة يا أمي"

اصحي و سمعيني

من شفاهك لحظه اسمي

(5)

ارجعي مثل أول

عاتبيني على فوضى حياتي

و أوعدك لا تحاتي

بعد هاللحظة يا أمي

غرفتي المجنونه مثلي

برتبها عشانك

ارجعيلي يا كل الوجود

دلعيني

عرفيني على صديقاتك وقولي:  

هذي نفالة العش الصغيرة

وآخر العنقود

 

اخر النزف :

الهي يا مكحل بالأمل عيون

الصابرين

اشفي أمي وخفف من وجعها

واحرسها بعينك اللي ما تنام

ارحم ضعف

مخلوق أصله طين

ما يرتجي بالكون غيرك

ولا بغيرك يستعين

 

العنقاء

 

 

 

 

 

Related Posts