قلوب

عبرت شطآني : العنقاء

بعض القلوب
صارت فنادق
فيها م البشر أصناف
فيها  اللي  يكذب
وفيها راعي الوفا الصادق
فيها  اللي ما يحس بغيابك
و لٱ  يسأل ليه ضايق ؟
وفيها اللي   مخلص بحبك
ويفقدك لو تغيب

عن عينه دقايق

بعض القلوب مثل السنين
فيها الدفا والبرد
فيها الجفا والود
فيها الوفا والصد
وفيها الشتا والصيف
وكل فتره يجيها ضيف
بعضهم يرحل بلا ميعاد
وبعضهم يجرح
وبعضهم يشعرك انك
وطن وبلاد
وبعضهم يطعن
ولفرحة بعض البشر
يستوي جلاد

بعض القلوب حيل ورديه
تمشي علي النية
ما تهتم بكره وش بيصير
بسيطه
مثل الجيمر الأبيض
تزعل بلحظه
وترضي بلا تبرير
وبعض القلوب
بالحب  مزنها ممطرة
تجيلك محملة بكل الوفا
والخير والمعروف
وبعض القلوب  رمضا
ما فيها غير الضما
وفيها الجشع والخوف

بعض القلوب مثل الأرض
تزرعها أيام
وتحصدها جمال ونور
وبعضها أرضها جفاف وبور
تزرعها سنين
وبعد السنين سنين
ومع الأسف
ما تثمر إلٱ السمر والجور

وبعض القلوب مثل الشموع
تلاقيها للحبايب تحترق
لو تضيق
ولو تنخذل طول الطريق
تبقى للوفا عنوان
وغير الموت
مايخيلها شيء عنك تفترق
وبعض القلوب

تخذلك وتعطيك الظهر
ويتحول لينها فجأه حجر

ولو ناديتها ما تسمعك
ولا تحس باللي يوجعك
وتموت كل الذكريات
وتحترق كل الوعود
و لٱ يبقى إلٱ شيء مات
شيء لٱ يمكن يعود

وبعض القلوب
رائعة مثل الشروق
ناديها تجيك
لما تفرح او تضيق
تلاقيها معك إلى آخر طريق
وبعض القلوب
قاسيه مثل الغروب
تتركك وسط الظلام
ولو تناديها تتجاهل نداك
وتتركك هامش وحيد
منسي ع أطراف الورق
أو منارة غشاها الموج
و كل ما فيها غريق

والقلوب أنواع

بعضها مليانه شقاوة
مثل أفعال السنافر
عايشين ف عالم جميل
وأحلامهم : عيشه سعيدة
و "كمأ" وانه يهزم شرشبيل
وبعض القلوب فيها قساوة
شرشبيل
كل يوم خطه غير
كل همه يشوف واحد م السنافر
جدامه قتيل
ويهدد
طول عمره "ستندمون"
وهذا إحنا جيل بعد جيل
والسنافر عددها ما نقص

وشرشبيل باقي ما يأس

وتمشى الحياة

كل قلب فيه نكهة

غير عن باقي القلوب

توقع تصادف

مثلها على بعض الدروب

العنقاء